Vira Vira, Saan Nga Agsingir Ti Penalty Bayat Ti ECQ

Inpalgak ti Vira Vira Rural Waterworks and Sanitation (Vira Vira) iti Pagudpud, Ilocos Norte a saanda nga agsingir ti penalty ken surcharges kadagiti maladaw nga agbayad ti water bills-da kabayatan ti enhanced community quarantine wenno ECQ.

Kuna ni Jojo V. Constantino, general manager ti Vira Vira, ti saanda a panagsingir ti penalty ken surcharges ket tulongda kadagiti consumers a marigrigatanen gapu iti mapaspasaran a health crisis gubbuay ti coronavirus.

 Innayun pay ni Constantino nga uray iti panawen ti ECQ ket agrespondeda kadagiti complaints ken emergency cases tapno masigurado a nalabon latta ti supply ti danum manipud iti Vira Vira.

 Ti Vira Vira ket agsup-supply ti danum iti nasurok nga innem a ribu a residente iti barangay Subec, Saguigui, Baduang, Burayoc ken Saud iti ili ti Pagudpud.

 Naestablisar daytoy idi 1980s babaen ti tulong ti Department of Agrarian Reform – Ilocos Norte ken ti Water and Sanitation Program ti World Bank.