Housing project para mag-uruma ha Pangasinan, iginlunsad

An Department of Agrarian Reform (DAR) in naglunsad hadton a-kinse hinin bulan han Disyembre han gisyasyahani hini nga housing project nga tinawag nga “Balai Housing Program” para ha mga mag-uruma ha Pangasinan. 

Pinangunahan ni DAR Secretary Brother John Castriciones an groundbreaking ceremony ha Brgy. Carayungan Sur, Umingan Pangasinan, kun diin nahimumutang an 26,111 square meter nga lote nga ginhatag ni Umingan Mayor Michael Carleone Cruz para hini nga proyekto.

Siring pa niya, ini nga duha ka-ektarya nga lote in napili komo pilot site para hini nga proyekto kun diin an balay nga nagkakantidad hin ₱300,000.00 in usa nga duplex nga an floor area in may-ada sukol nga 36-square meter, may kasilyas, may pasilidad para tubig ngan kuryente, naka-tiles an salug, ngan pininturahan an sakob ngan gawas han balay.

“An mga benepisayaryo han reporma ha tuna in may higayon nga makaangkon hini nga de-kalidad ngan maarakus nga pabahay. Pinaagi hini nga proyekto, an mga parag-uma in magkakamay-ada moderno ngan desente nga balay para mapakusog an ira morale, nga puydi magin hinungdan hin pag-upay pa han ira ani, kita ngan kalidad hin kinabuhi,” sumala pa kan Castriciones.

Siring naman ni Undersecretary for Support Services Emily Padilla, kun may-ada usa nga proyekto nga excited ako, amo ini nga housing program “BALAI PunDAR, Maagang Pamasko para sa ARBO!”

An karuyag sidngon han BALAI, pagklaro pa ni Padilla, in “Building Adequate Livable, Affordable and Inclusive Farmers’ Housing Program nga babag-uhon hini an hitsura ha mga kahurunan kun diin an mga kabalayan yana han mga parag-uma in mga simple, ruba-ruba ngan mga hinaklupan.

Babag-uhon han BALAI an kahurunan, pagdu-on pa niya.

An BALAI Farmers Housing Program in usa nga holistic ngan komprehensibo nga solusyon nga naghihingyap maabot an inclusive growth pinaagi hin pagpauswag han kinabuhi han mga parag-uma, labi na adton mga benepisyaryo han reporma ha tuna.

Labot ha Umingan, an nasabi nga proyekto in mayday gihapon pilot site ha Bayombong, Nueva Viscaya, Gabaldon or San Jose City ha Nueva Ecija, Basey ha Samar, Argao ha Cebu, Daet ha Camarines Norte ngan Calina ha Davao.

An DAR in nakipagbuligay ha Department of Human Settlements and Urban Development (DHSUD) ngan iba pa nga mga ahensya han gobyerno para hini nga proyekto. ###