Cebu — Nagdulot ng tuwa at ginhawa sa maliliit na komunidad ng Pinamungajan, Toledo, at Aloguinsan sa Cebu habang ang 220 Agrarian Reform Beneficiaries (ARBs) ay nagdiwang matapos maging malaya mula sa dekadang pagkakautang nila sa lupa dulot ng pagpapatupad ng New Agrarian Emancipation Act.

“Malipay gyud ko. Sa wakas, dili na mi mobayad sa Land Bank,” (Talagang masaya ako. Sa wakas, hindi na namin kailangang magbayad sa Land Bank of the Philippines) ani Bienvenido M. Tango-an, habang bakas sa kanyang tinig ang saya at hindi makapaniwalang kagaanan. Si Bienvenido, isang magsasaka mula sa Pinamungajan, ay isa sa mga ARB na napatawad ang natitirang bayarin sa amortisasyon ng lupa sa ilalim ng Republic Act No. 11953 o ang New Agrarian Emancipation Act, na ipinatupad ng Department of Agrarian Reform (DAR).

Umabot sa Php 502,469.68 ang kabuuang halaga ng pinatawad na utang ng mga benepisyaryo mula sa Toledo Cluster ng DAR Region VII, na sumasaklaw sa 170.382 ektarya ng lupaing agrikultural. Sa bilang na ito, 157 ay mula sa Pinamungajan, 52 sa Toledo, at 11 sa Aloguinsan.

Ang batas na ito ay bahagi ng layunin ni Pangulong Ferdinand R. Marcos, Jr. at DAR Secretary Conrado M. Estrella III na itama ang mga pagkukulang sa repormang agraryo. Sa buong bansa, mahigit Php 57 bilyon ang kabuuang halaga ng mga bayaring papatawarin para sa mahigit 600,000 ARBs.

Binanggit ni Secretary Estrella III na ang New Agrarian Emancipation Act ay hindi lamang tungkol sa lupa—ito ay tungkol sa pagbibigay ng pag-asa at kinabukasan sa mga magsasaka.

Higit pa sa mga bilang, ramdam ang lalim ng epekto sa mga tao. Dahil wala nang buwanang bayarin sa lupa, may pagkakataon na ngayon ang mga magsasaka tulad ni Bienvenido na mamuhunan sa mas maayos na gamit sa pagsasaka, magtanim ng iba’t ibang pananim, at masuportahan ang pag-aaral ng kanilang mga anak. (Prepared and written by: Sheen Claudette C. Paz-Leyco)