Valencia City, Bukidnon – Pinangasiwaan ng Department of Agrarian Reform (DAR) ang pagbuo ng kasunduan sa pagbebenta sa pagitan ng Araneta Farmers Agrarian Reform Beneficiaries Association Multipurpose Cooperative (AFARBAMCO) at NVM Marketing, Inc. upang mabigyan ng mas malawak na pamilihan ang lokal na tanim na black rice ng kooperatiba sa Valencia City.

Dahil sa bagong ugnayan, mabibili na ang de-kalidad na black rice ng AFARBAMCO sa NVM Farmers Market sa Valencia City. Makakatulong ito para mas makilala ang produkto at mas madaling maabot ang mga mamimiling naghahanap ng masustansyang pagkain.

Pormal na nilagdaan ang kasunduan sa isang seremonya na dinaluhan ng mga kinatawan ng DAR Bukidnon, mga kasaping Agrarian Reform Beneficiaries (ARBs) ng AFARBAMCO, at NVM Marketing, Inc. Ayon sa kasunduan, magkakaroon ng nakalaang lugar ang kooperatiba sa pamilihan para sa kanilang produkto—isang hakbang para mas tumaas ang kita ng mga ARB at matugunan ang pangangailangan ng mga mamimili.

“Malaking hakbang ito para sa aming kooperatiba,” ayon sa isang kinatawan ng AFARBAMCO. “Lubos ang aming pasasalamat sa DAR sa pagtulong sa amin na makapasok sa bagong merkado. Ang pagkakataong ito ay hindi lang makakatulong sa kabuhayan ng aming mga miyembro, kundi naipapaabot din sa mas maraming tao ang benepisyo ng black rice sa kalusugan.”

Ibinahagi naman ni DAR Provincial Agrarian Reform Program Officer (PARPO) II Atty. Juliene R. Manlunas na mahalaga ang mga proyektong tulad nito sa pagbibigay ng mas matatag na kabuhayan sa mga ARB. “Ipinapakita ng proyektong ito ang hangarin ng DAR na suportahan ang mga ARB sa pamamagitan ng koneksyon sa maaasahang merkado,” aniya.

Inaasahan na ang kasunduan ay magpapalawak sa kakayahan ng AFARBAMCO na maipakilala ang kanilang produkto, magkaroon ng tuloy-tuloy na kita, at makatulong sa paglago ng lokal na ekonomiya ng Bukidnon.

Ang AFARBAMCO ay isang kooperatiba ng ARBs na nagsusulong ng masustansyang pagsasaka at pagtangkilik sa lokal na ani. Samantala, ang NVM Marketing, Inc. naman ay isang kilalang pamilihan sa Valencia City na tumutulong sa mga lokal na magsasaka na maibenta ang kanilang ani sa mga mamimili. (By: Resurreccion Arcaina with inputs from DAR-Bukidnon)