QUEZON CITY – Bilang pakikiisa sa pagdiriwang ng “Ease of Doing Business Month” nagsagawa ang Department of Agrarian Reform (DAR) ng isang oryentasyon tungkol sa Republic Act No. 11032, o ang Ease of Doing Business (EODB) and Efficient Government Service Delivery Act of 2018. Layunin nitong mas mapabuti ang pagbibigay ng serbisyo sa mga tanggapan ng DAR sa buong bansa.

Dumalo sa aktibidad ang mga mataas na opisyal mula sa Central Office at mga regional offices ng DAR, pati na rin ang mga miyembro ng DAR Committee on Anti-Red Tape (CART). Layunin ng pagsasanay na mas maunawaan nila ang nilalaman ng batas at masiguro ang pagsunod ng DAR sa mga alituntunin ng Anti-Red Tape Authority (ARTA). Ito sa kalaunan ay magpapadali ng mga proseso sa gobyerno, magbabawas ng red tape, at magsusulong ng transparency, digitalization, at inobasyon sa serbisyo publiko.

Ang ARTA ay isang ahensya ng gobyerno sa ilalim ng Office of the President, at ang pinuno nito ay may ranggong Cabinet Secretary, na nagpapakita ng kahalagahan ng layunin nitong gawing mas madali at mabilis ang mga transaksyon sa Pilipinas.

Sa mensaheng ipinarating ni Undersecretary Amihilda Sangcopan para kay DAR Secretary Conrado Estrella III, binigyang-diin ng kalihim ang kahalagahan ng pagsasanay: “Ang Ease of Doing Business Act ay hindi lamang batas, ito ay isang pangako na ayusin at pagandahin ang pagbibigay natin ng serbisyo sa ating mga kababayan—alisin ang red tape, bawasan ang mga di-kailangang hakbang, at palaganapin ang makabago at maagap na sistema,” ani Secretary Estrella.

Dagdag pa niya na mahalaga ang papel ng mga opisyal at CART members: “Kayo ang mga lider at tagapagpatupad ng reporma sa ating kagawaran. Gawin nating modelo ng mahusay na serbisyo ang ating mga tanggapan.”

Ang oryentasyon ay bahagi ng patuloy na hakbang ng DAR upang tiyaking ang mga proseso nito ay nakaayon sa layunin ng pamahalaan na mapabuti ang takbo ng negosyo, mapaunlad ang serbisyo para sa mamamayan, at maibalik ang tiwala ng publiko sa gobyerno.

Sa pamamagitan ng programang ito, ipinapakita ng DAR ang kanilang pagtupad sa mga prinsipyo ng mabilis, tapat, at may pananagutang serbisyo—para sa isang Bagong Pilipinas kung saan nagsisimula ang husay sa serbisyo sa loob mismo ng ahensya. (By: Pinky Roque)