Trade Fair pag-aabrihan buwas hin aga ha DAR

          Duha ka-adlaw nga trade fair pag-aabrihan buwas hin aga (Hunyo 27) ha libong han Department of Agrarian Reform o DAR Regional Office nga namumutang ha Sto. Niño Extension hinin syudad han Tacloban.

          Ini in kasumpay ha pagtigaman yana nga bulan han ika-trenta y cuatro ka-tuig han pagpatuman han Comprehensive Agrarian Reform Program o CARP, ug han ika-singkwenta anyos han Operation Land Transfer.

          Sumala kan Melecia Ong, hepe han Agrarian Reform Beneficiaries Development Sustainability Program Division, magkadurudila-in nga mga produkto hin mga agrarian reform beneficiaries organization o ARBO ha bug-os nga Sinirangan Bisayas an ipapamaligya dida hini nga trade fair tinikangan buwas (Hunyo 27) tubtub hiton martes hin kulop (Hunyo 28).

          Dugang pa ni Ong, labot hin mga produkto ha uma, sugad hin bugas, utanon, duma ngan prutas, makakapalit gihapon kamo hin bunay, processed foods, mga karan-un ngan handicrafts ha habubu nga presyo.

          Iginsayod pa ni Ong, nga an pagdumara hini nga trade fair in para mabuligan an mga ARBO maipakilala ha publiko an ira mga produkto.

          An tema han selebrasyon yana nga tuig amo an “Tuloy ang Pag-asa at Pag-unlad Hatid ng Repormang Agraryo. ###